klassentreffen
© sedl /2008/2010

20 joahr san jetzt vurbei
seit i durch diese tia marschiert
nie mehr schul’, hob i domois g’sogt
heit waß i, do hob i mi a bissl g’irrt

vur 20 joahr woar no ollas aundas
oba is net blieb’n a vüles gleich?
im guatn wia im besn
de dimensionen san hoit neich

s‘woar interessant, eich olle treffen
zeit hinterlosst hoit ihre spuren
olle haumma uns vaändat
auf jeden foi samma ölta wurd’n

oba irgendwie hots do a jeda g’schofft
a jeda auf sei oat
mauncha vielleicht net gaunz so wia erhofft
und aundare wieder mehr ois ma jemois hätt’ erwoart’

und i hob's scho domois g’wußt
eigantlich is des net mei varein
mir is des nur erst späta wurd’n bewuß
durt wo olle aundan san, do woit i nie sein

es woar a schena ob’nd, ziemlich aufschlußreich
hob scho g’wußt warum i net wirklich kumma woit
weil irgendwie is ollas bliebn gleich
es is nur afoch 20 joahr späta hoit

und i winsch eich ollas guade
doch jetzt muaß i leida geh
waunn ma uns olle wieda treffen?
i tat eich, sog ma, in 40 joahr olle gern amoi wiedersehn