plottnkoarl
© sedl 2008

in da schul woa i oft stangln
und bin in koarl sei plotteng'schäft
hob wenig kauft, doch vü aung'heat
da plottnkoarl hot fia mi aufg'legt

wia in da bar auf solche hocker
bin i g'huckt, musik im kopf
und hob noch jeda plottn g'frogt
ob er no wos leinwands hot

wenn ma allan woan, wia so oft
hot da koarl lauta draht
hot ma sochn vurg'spült, vü erklärt
und mir woar niemois fad

hob vü glernt in dera zeit
mehr ois an d' schul beibringa kaunn
und de große liebe zur musik
de hot da koarl mir auntaun

den plottnkoarl gibt’s heit nimmermehr
des g'schäft steht laar jetzt noch'n dritten friseur
a döner woar durt, glaub i, a scho drin
doch de zeit fia musik
zum wirklich auhean vo an stück
de zeit fia laungsamkeit, de is dahin

wia de cds aufkumma san
is a kumma boid sei zeit
er hots geahnt, "boid kriagst musik
im supamoarkt der beliebigkeit

de vurwärts-tasten ist a problem
weil schnöll is weidadruckt
do tuat doch kana mehr musik aunhean
des is doch varruckt!"

und wia's so is mit dinosaurier
ausg'sturbn woar er boid
und des mit'n aunhean von musik
erklär heit wen amoi

heit hurchst a poar sekunden eine
und dann springst schon zum nächsten stück
mir scheint, a bissel wenig zeit
fias auhean von musik

den plottnkoarl gibt’s heit nimmermehr . . .

heite wü kaum no wer zuhean
und net vüle tan vasteh'n
des leben heit rennt heit irgendwie
so wia bei plottn und cd